ആദി മുദാ്ല്ക്ക് കല്യണ കാ്സി ഗേവാദാന കുറുമ്പാ്ര് സട്ട്മെട്ട് പഡി അവ്വെ അപ്പാ്ന് ഊരു ജനഗാള്, ജാദ്യാ്ന്, കുറുദലെ, ബണ്ടാ്രി, മണ്ണ്ക്കാറാ്ന്,മൂപ്പാ്ന് ഇവാരൊട്ട്ക്ക് ഒന്റായി എജേന്ത് ഒന്റ് നല്ല നാള് നോഡി, പെ്ണ്ണ് കേ്ള്ക്ക്യ പോവാദ്.പെ്ണ്ണ് ഊരുക്ക് പോയി എജ്ജി ,പെ്ണ്ണ് കേ്ള്ക്ക്യ പോവ ബീ്ഡ്ക്ക് പോയി കുക്കാന്ത് എ്ളേത്ത പ്റ, അവ്വെ അപ്പാ്ന്ന കേ്ട്ട പ്റ പെ്ണ്ണ്നാമ് കേ്ട്ട് ഒറേപ്പ് മാഡ്ന പ്റത്തെ മറിസി ബീ്ഡ്ക്ക് ബരുവാദ്.അദ്ക്ക് പ്റ ഗണ്ട് ബീ്ഡ്ല അവ്വെ അപ്പാ്ന് മഗാ്ന്ന പെ്ണ്ണ് ബീ്ഡ്ക്ക് ബേലെ ഗേയ ബെ്ഡ്വാദ്. 6 മാ്സ അല്ലദെ പോന 1 ബര്സമാട്ടൊ ബേലെഗേവാദ്.അയി ബേലെ മെച്ച് പട്ട് നാ്ന് പോന്റെ എന്റ് പെ്ണ്ണ് സൊന്ന, കെ്ട്ട്യ പോവ മാപ്പ്ളെ മറിസി തന്ന് ബീ്ഡ്ക്ക് ബരുവാദ്.പ്റ ഗണ്ട് ബീ്ഡ്ല അവ്വെ അപ്പാ്ന് പെ്ണ്ണ് ബീ്ഡ്ക്ക് പോയി കല്യണ മാഡ്യുള്ള നാള് നോഡി തീര്പ്പ് മാഡി ബരുവാദ്. അദ്ക്ക് പ്റ ഊരുര സേദി പോയി സേദിഗാള് സൊല്ലി മാഡി ബരുവാദ്.അഡ്ത്ത ബാ്ര കല്യണ മാഡുവാദാ്ന ഈ ബാ്ര താ്നെ റാഡൂരലവാ്ര്മ് പന്ത ബേലെ ഗേവാദ്.പന്ത ബേലെ ഗേന്ത് മുഡിന്ത അരിസാമനഗാള്ക്ക്മ്, ഉഡുപ്പ്സഡ്പ്പ്ഗാള്ക്ക്മ് പോവാദ്. എല്ലാ സാമനഗാള് ഒര്ക്ക്ന പ്റ , നാളേക്ക് കല്യണ ആ്ന ഇന്റ്ല നാള് റാവെതാ്നെ മാപ്പ്ളെ ഊരുല പെ്ണ്ണ് ഗണ്ട് പെ്ണ്ണൂരുക്ക് പെ്ണ്ണ് കൂട്ടി ബര്യ പോവാദ്.പെ്ണ്ണൂരുക്ക് എജ്ജ്ന പ്റ കഞ്ചിഗാള് തിന്റ് മാഡി എ്ളേത്ത പ്റ ഊരു ജന കൂത്താഡ്വാദ്. കൂത്താഡി കളിന്ത പ്റ ജനൊട്ട്ക്ക് ഉറാങ്ക്വാദ്. ഉറാങ്കി റാവെതാ്നെ ഇ്ളാഗ്ന പ്റ റാഡൂരുല ജന നീര് നെ്ഡി ആഡിമാഡി ഒരിങ്കി പെ്ണ്ണ്നാമ് മാപ്പ്ള്ളെനാമ് ഒരിങ്കിസി കഞ്ചി തീറ്റിസി, പേയി ബീ്ഡ്, സാമികോയാ്ല്,ഇദ്ക്ക് എ്ഡ്ത്ത് പോയി കുമ്മുഡുസി മാഡി പെ്ണ്ണ്ന കൂട്ടി മാപ്പ്ളെ ബീ്ഡ്ക്ക് കൂട്ടി പോവാദ്.മാപ്പ്ളെ ബീ്ഡ്ക്ക് പോയി എജ്ജ്ന പ്റ താ്ലി കെ്ട്ടി ബീ്ഡ്ക്ക് നൊഗേസ്വാദ്. പ്റ ഊരു ജനാക്ക് അട്ട പന്തിസോറ്ന ബന്തവാ്ര്ക്ക്മ്, ഊരു ജനാക്ക്മ് ഇക്കി കൊഡ്ക്കുവാദ്.മറ്നേര ബെ്ഡിന്ത പ്റ റാഡൂരുല മൂപ്പാ്നാമ്, മാണ്ണ്ക്കാറാനാമ്,ജാദ്യനാമ്,കുറുദലെ ഇവാ്രെല്ല ഒന്റായി എജേന്ത് കളാക്ക് പായി ബിരിസി പെ്ണ്ണ്നാമ് മാപ്പ്ളെനാമ് പായിക്ക് കുക്കാ്സി പര്യപണ പെ്ണ്ണ് ബീ്ഡ്ഗാറാ്ര്ക്ക് കെ്ട്ടി കൊഡ്ക്കുവാദ്. അദ്ക്ക് പ്റ പെ്ണ്ണൂരുലവാ്ര് മറിസി തമ്മ് ബീ്ഡ്ക്ക് പോവാദ്.അദ്ക്ക് പ്റ റാഡായിസെ കളിന്ത പ്റത്തെ മാപ്പ്ളെനാമ് പെ്ണ്ണ്നാമ് ഒന്റായി കെ്ഡ്യാക്ക്യ ബെ്ഡ്വാദ്. ഇത്തെത്തെ കല്യണ ഗേവാദ്.
Search
കല്യണ
Share Everywhere
